විමල්,දිලිත් සහ සර්ව ජනබලය
දිලිත් ජයවීරගේ මව්බිම ජනතා පක්ෂය පසුගියදා විමල්,ගම්මන්පිල,ගෙවිඳු,චන්න,වාසු සහ ශ්‍රී ලංකාවේ කොමියුනිස්ට් පක්ෂය එක්ක එකතු වෙලා සර්ව ජනබලය බලය නමින් සන්ධානයක් පිහිටවා ගත්තා.සන්ධානය පිහිටවලා පැය 24 ක් යන්න ඉස්සෙල්ලා දිලිත්ගේ මව්බිම ජනතා පක්ෂයට තමන්ගේ පක්ෂයේ සභාපති ආචාර්ය සරත් අමුණුගම අහිමිවුනා.
සර්වජන බලය සන්ධානය ජූනි 18 වෙනිදා නුගේගොඩදී රැළියක් තියන්න සුදානම් වෙනවා. එයාලා කියන්නේගේ 69 ලක්ෂයේ බලාපොරොත්තු යලිත් බලගන්වන්න ජූනි 18 වෙනිදා සවස දෙකට නුගේගොඩට එන්න කියලයි. 69 ලක්ෂයේ ජනවරම බලගන්වන්න ආයෙත් මහතීර් මොහොමඞ් කෙනෙක් සහ විලැද්මීර් පුටින් කෙනෙක් ගේන්නයි විමල්ලා හදන්නේ. කොහොම උනත් විමල්ලා,ගම්මපිලලා දිලිත්ගේ කරේ නැගලා ගහන්න හදන මේ වංගුව ගැන රටට කියන්න ඕනි.
ඒක කියන්න රටේ රාළ විමල්ගේ ඉතිහාසයෙන් උදාහරණ කීපයක් ගන්නවා.2010 ජනාධිපතිවරණයෙන් පස්සේ ජාතික නිදහස් පෙරමුණ මහින්ද රාජපක්ෂගේ ආණ්ඩුව නියෝජනය කළා.හැබැයි 2013 වෙනකොට රාජපක්ෂ ආණ්ඩුව සහ ජානීපෙය අතර මතවාදී ගැටුමක් නිර්මාණය වුනා.ඒ මතවාදී අර්බුදය ඉස්සරහා ඊට සමාන මතයක් දරපු ජාතික හෙල උරුමයත් එක්ක ජානීපෙය එකට විවිධ ක්‍රියාමාර්ග ගත්තා.ඒකාබද්ධ මාධ්‍ය සාකච්චා,බිම් මට්ටමේ ඒකාබද්ධ රැස්වීම් සහ පක්ෂ දෙක වෙන වෙනමත් ක්‍රියාමාර්ග තේරුවා.
එදා ජාතික නිදහස් පෙරමුණේ ප්‍රධාන ලේකම් විදිහට හිටියේ රටේ රාළ.රටේ රාළ මේ ඒකාබද්ධ රැස්වීම් සම්බන්ධීකරණය කරන්න ජානීපෙ පැත්තෙන් සම්බන්ධ වුනා.ජාතික හෙළ උරුමය පැත්තෙන් සම්බන්ධ උනේ ආචාර්ය අනුරුද්ධ ප්‍රදීප්.ඒ වෙනකොට පාඨළී,රතන සහ ගම්මන්පිලා හිටියේ එකට,එකම පක්ෂයේ.කොහොම හරි මහින්දගේ ආණ්ඩුවට අභියෝග කරමින් ජාතික නිදහස් පෙරමුණ සුගතදාස ගෘහස්ථ ක්‍රීඩාංගනයේ දැවැන්ත විරෝධතා රැස්වීමක් කළා.
එතනදී මහින්දගේ ආණ්ඩුවට ජනිපෙන් යෝජනා 12 ක් ඉදිරිපත් කළා.ඒ යෝජනා මහින්ද රාජපක්ෂ ආණ්ඩුවෙන් ඉෂ්ඨ කරන්නේ නැත්තම් ජාතික නිදහස් පෙරමුණ ආණ්ඩුවෙන් අයින් වෙන බව විමල් එදා සුගතදාස ගෘහස්ථ ක්‍රීඩාංගණයේදී කරපු කතාවේදී කිව්වා.මේ විරෝධතාවයත් එක්ක ජනාධිපති මහින්ද ජාතික නිදහස් පෙරමුණට සාකච්ඡාවක් දුන්නා.ඒ සාකච්ඡාවට විමලුත්,පක්ෂ ප්‍රධාන ලේකම් සහ වීර කුමාර දිසානයක හරි පියසිරි විජේනායක හරි සම්බන්ධ වුනා.
ඒ සාකච්ඡාව අතරතුර විමල් හරි අපූරු කතාවක් මහින්දට කිව්වා.විමල් කිව්වේ අපි තව ටිකක් මෙහෙම ගිහින් ආපහු හැරෙනවා.චම්පික එතනදී එලියට යනවා.මමයි,ගම්මන්පිලයි හැරිලා එනවා කියලා විමල් මහින්දට කිව්වා.ඒ සාකච්ඡාව ගිය අනිත් සඟයා එක්ක පක්ෂ ලේකම් මුහුණට මුහුණ බලාගත්තා.ඇත්තටම ඒක දැවැත්ත පාවාදීමක්.එකට අරගල කරපු කණ්ඩායම පාවා දුන්නා විතරක් නෙවෙයි එතන හිටපු කෙනෙකුත් ගලවලා මහින්දට ගිහින් දුන්නා.
ජාතික නිදහස් පෙරමුණේ දේශපාලන මණ්ඩලය සහ විමල් අතර ගැටුම ආරම්භ වෙන්නේ එතනින්. ඒ වගේම විමල් දැඩි ලෙස හිටිය ස්ථාවරයක් තමයි කොළඹ දිස්ත්‍රික්කය කියන්නේ විමල්ගේ බූදලයක් කියලා.විමල් තමයි ඇත්තටම කොළඹ දිස්ත්‍රික් ඡන්ද පදනම වේගයෙන් ආක්‍රමණය කළේ. විමල් සරත් වීරසේකරට පරදිනකම්ම ජානීපේ සංවිධාන ජාලයට කොළඹ දිස්ත්‍රික් ඡන්ද පදනම ආරක්ෂා කරන්න පුළුවන් වුනා.
මුලදී ඒක කරන්න විමල් ළඟ හොඳ කාඩර්ලා සහ හොඳ බහුජන චරිත හිටියා.අචල ජාගොඩ,රොජර් සෙනෙවිරත්න කියන්නේ එහෙම බහුජන චරිත දෙකක්.ඊට අමතරව මොහොමඩ් මුසාමිල් සහ ප්‍රියංගා කොතලාවලත් හිටියා,හැබැයි විමල් කවදාවත් කොළඹ දිස්ත්‍රික්කයෙන් එයාලට අවස්ථාව දුන්නේ නෑ.ජාගොඩට කොළඹ ලයිස්තුව නොදී විමල් ජාගොඩව ජාතික ලයිස්තුවට දැම්මා. ඒ වෙනකොටත් විමල් එක්ක පාර්ලිමේන්තු යන්න පුළුවන්කම තිබුණ රොජර්ට විමල් කවදාවත් පාර්ලිමේන්තු අවස්ථාවක් දුන්නේ නෑ.
රොජර් දැමීමෙන් විමල්ට කොළඹ දිස්ත්‍රික්කයේ පළවෙනියා වෙන්න බැරි වෙයි කියන සැකය විමල්ට දිගටම තිබුණා.අවසානයේදී රොජර්ට දාපු කැපිලි නිසා රොජර් පක්ෂය දාලා ගියා.රොජර් ලයිස්තුවට දාගත්තොත් කොළඹ පළවෙනියා වෙන්න බෑ කියලා හිතපු විමල්ට රොජර් නැති ලයිස්තුවකදී සරත් වීරසේකරට දෙවෙනි වෙන්න සිද්ධ වුනා.විමල් මහ මැතිවරණයකදී හැසිරෙන විදිහ ගැන ජානීපේ දේශපාලන මණ්ඩලයේ හිටපු අයට හොඳ අවබෝධයක් තියනවා.විමල්ලා මේ සන්ධානය හදන්නෙත් මහ මැතිවරණයක් ඉලක්ක කරගෙන.ගොඩක් දුරට රටේ රාළ කියන අද්දැකීම මේ සන්ධානයේ අයටත් ගන්න එදාට පුළුවන් වෙයි.
විමල් ජාතිවාදියෙක් කියලා රටේ රාළ කියන්නේ හේතු ඇතිවයි.එක වෙලාවකට උතුරු හා නැගෙනහිර පලාත්ද ඇතුළුව රටේ සියලුම දිස්ත්‍රික්ක ආවාරණය කරමින් දේශප්‍රේමී දමිල ව්‍යාපාරය නමින් දමිල ප්‍රජාව සම්බන්ධ කරගත්ත දේශපාලන ව්‍යාපාරයක් ජනිපෙන් ගොඩනැගුවා. ඒක ජානීපෙ ප්‍රධාන ලේකම් යටතේ ගොඩනැගුනු සංවිධානයක්.2013 ජානිපෙ මැයි රැලියටත් දේශප්‍රේමී දමිල ව්‍යාපාරයය නියෝජනය කරමින් උතුරු සහ නැගෙනහිර පලාත්වල දමිල සහෝදර,සහෝදරියන් සහභාගී වුනා.
විමල් එක්ක ඒ සංවිධාන කැඳවපු පළවෙනි දවසේම ඒ සංවිධාන ජානිපෙයට අහිමිවුනා. පක්ෂයත් එක්ක අවුරුද්දක වැඩි කාලයක් ඉතා කිට්ටුවෙන් ගනුදෙනු කරපු ඒ අය විමල් එක්ක ගත්ත පළවෙනි රැස්වීමේදී විමල්ගේ ආරක්ෂකයෝ යොදලා දැඩි පරීක්ෂාවකට ලක් කළා.එයාලා පක්ෂයේවීමට වඩා දෙමලවීමේ සැකය විමල්ට තිබුණා.ඇත්තටම කිසිකෙනෙක් නොහිතපු,යුද්ධය ඉවර වෙලා අවුරුදු හතරකට පස්සේ ඒ කරපු හිත් රිදවීමෙන් ඒ දෙමල සහෝදරවරු දැඩි කලකිරීමට පත්වෙලා පක්ෂය අතැරලා ගියා.
එතනින් ඒ සංවිධානය අභාවයට ගියා.ඒ වගේම 2016 වර්ෂයේදී මහින්ද සහ මෛත්‍රී එකතු කිරීමේ යෝජනාවක් ජානිපෙ දේශපාලන මණ්ඩලයේ සම්මත වුනා.යෝජනාව උනේ මහින්ද සහ මෛත්‍රී එකතු කිරීමේ වැඩිම වැඩ කොටස කරපු පක්ෂය බවට ජානීපෙ පත්විය යුතුයි කියලයි.ඒ අනුව මහින්ද සහ මෛත්‍රී එකතු කිරීමේ සාකච්ඡාව ඒ දෙන්නත් එක්ක වෙන වෙනම පැවැත්වුනා.මෛත්‍රී එක්ක සාකච්ඡා වට එකොලහක් තිබ්බා.විමල් සාකච්ඡා හතකට සහභාගී වුනා.
අනිත් සාකච්ඡාවකට විමල්ට සහභාගී වෙන්න බැරි වෙන්නේ විමල් ඇතුලට ගිය හින්දයි.මේ සාකච්ඡා මෙහෙම යද්දී බැසිල් ලංකාවට ඇවිත් පොදුජන පෙරමුණේ කටයුතු පටන් ගත්තා.මුලදී බැසිල් සහ විමල් අතර අමනාපයක් තිබුණත් ටික දවසකින් විමල් සහ බැසිල් හොඳම යාළුවෝ වුනා. එතනදී තමයි රාජපක්ෂලා විමල්ට ලණුව දුන්නේ. එයාලා විමල්ට හැදුවේ පොදුජන පෙරමුණේ ජාතික සංවිධායක කියන සිහිනය.විමල් ඒ ලණුව කෑවා.
රාජපක්ෂලාගේ ලණුව කාලා විමල් පොහොට්ටුවේ ජාතික සංවිධායකමට ඇඳගෙන හිටියා.එතනදී විමල් මහින්ද,මෛත්‍රී එකතු කරන සාකච්ඡාව පයින් ගහලා පොහොට්ටුවේ ජාතික සංවිධායකකම වෙනුවෙන් බැසිල්ලා එක්ක ශ්‍රිලනිපය දෙකඩ කිරීමේ වැඩේට හවුල්වුනා. ඉදියානු කොන්ග්‍රසය කඩලා ඉන්දිරා කොන්ග්‍රසය හදුවා වගේ ශ්‍රිලනිප කඩලා පොහොට්ටුව හදන්න ඕනි කියලයි එදා විමල්ට උපදෙස් දෙන න්‍යායාචාර්ය තෙමේ කිව්වේ.
රටේ රාළ කියන්නේ මේවා සියල්ල විමල්ගේ තනි වැරදි නෙවෙයි කියලයි.විමල් පිටිපස්සේ හිටපු දුෂ්ඨ බලවේග එයාලට ඕනි තැනට විමල් මෙහෙව්වා.එයාලට ඕනිදේ වෙනුවෙන් විමල්ගේ කට පාවිච්චි කළා.විමල් කියන්නේ ඉන්න පරිසරය අනුව වෙනස් වෙන දේශපාලන සත්වයෙක්.විමල් ඉන්නේ සාත්තරකාරයෝ ටිකක් එක්ක නං විමලුත් නියම සාත්තරකාරයෙක්.විමල් ඉන්නේ හෞතිකවාදියෝ සෙට් එකක් එක්ක නං විමල් මාක්ස්ටත් වඩා භෞතිකවාදියෙක්.
විමල් ඉන්නේ විඥානවාදීන් එක්ක නං විමල් තරං විඥානවාදියෙක් ලොවෙත් නෑ.හැබැයි විමල් එක්ක හැමදාම ඉන්න සෙට් එකක් හිටියා.ඒ විමල් එක්ක ඉන්න ජාතිවාදී න්‍යායාචාර්යවරු සෙට් එක,ඊළගට විමල් වටේට ක්‍රියාත්මක වෙන ඔත්තු සේවා ජාලය සහ විමල් වටේ ඉන්න ව්‍යාපාරික ජාලය.විමල් යොයපු සල්ලි ආයෝජනය කරලා තියන්නේ ඒ අය හරහා.මේ අයගේ ග්‍රහණයෙන් විමල් බේරගන්න එදා ජානීපෙ දේශපාලන මණ්ඩලය දැවැන්ත අරගලයක් කළා.
ඒ ගැන අද දිලිත් එක්ක එකතු වෙලා,විමල්ට පිටිපස්සේ පේලියේ ඉඳගෙන ඉන්න පියසිරි විජේනායක සහෝදරයා A to Z දන්නවා.විමල් දැන් ව්‍යවසායකයෙක් එක්ක ඉන්න හින්දා ව්‍යවසායකයන් විදිහට හිතයි කියලා රටේ රාළගේ තර්කයට අනුව කාටහරි හිතන්න පුළුවන්.හැබැයි ඒක වෙන්න නං රටේ රාළ කියන අර කණ්ඩායමෙන් විමල්ව ගලවගන්න ඕනි.ඊට ඉස්සෙල්ලා දිය රෙද්දෙන් දිලිත්ගේ බෙල්ල කපන්න විමල් දන්නවා.
හරි එහෙනම් ගිහින් එන්නම්.
ජයවේවා.
මීට
රටේ රාළ.
