දිනකර

 මෛත්‍රී ශ්‍රිලනිපය උකස් කළාද?

අද (20) ශ්‍රිලනිප මෛත්‍රී පාර්ශවයේ වැඩබලන ලේකම් සාරතී දුෂ්මන්ත අනීතිකව ශ්‍රිලනිප දේශපාලන මණ්ඩලය කියලා එකක් කැඳවලා තිබුණා.ඒ දේශපාලන මණ්ඩලයට දුමින්ද පාර්ශවයේ බොහෝ දෙනෙකුට ආරාධනා කරලා තිබුණේ නෑ.කීපදෙනෙකුට විතරක් කියලා තිබුණා.අද කැඳවපු දේශපාලන මණ්ඩලය නීත්‍යානුකූලයි කියලා පෙන්න ගන්න වෙන්න ඇති.රටේ රාළ කියන දේශපාලන ළමා සොල්දාදුවෝ ටීම් එකක් තමයි එතනත් හිටියේ.

දුෂ්මන්ත මේ කැඳවීම ගැන කියලා තිබුණේ දේශපාලන මණ්ඩලයේ එකොළොස් දෙනෙක් කරපු ඉල්ලීමකට අනුව කැඳවනවා කියලයි.දුමින්ද පාර්ශවට වැඩේ ආරංචි වෙලා එතෙන්ට ගිහින්. නිමල් සිරිපාල පක්ෂයේ ජේෂ්ඨ උප සභාපති විදිහට දේශපාලන මණ්ඩලය කැඳවීම නීති විරෝධී කියලා ලිඛිතව දැනුම් දීලා. දේශපාලන මණ්ඩලය බහුතර කැමැත්තට කැඳවනවා නම් ඊට අයිති සියලු දෙනා කැඳවන්න ඕනි,තමන්ට ඒ ගැන දැනුම්දීමක් කරලා නෑ කියලා දුමින්ද පාර්ශවයේ කීපදෙනෙක් වාචිකව සහ ලිඛිතව දීලා තියනවා.

දුමින්ද පාර්ශව දිගටම තර්ක කරලා තියෙන්නේ මේ කැඳවීම නීති විරෝධී කියලයි.ඒ ගැන වාද විවාද සිද්ධ වෙද්දී එකපාරට සාරති කියලා තියෙන්නේ හෙට ඒ කියන්නේ හෙට (21) පක්ෂ විධායක සභාව කැඳවන්න අවසර දෙන්න කියලයි. ඊට පස්සේ එතන ලොකු කාලගෝට්ටියක් එතන වෙලා.ඒ අස්සේ හරි එහෙනම් හෙට විධායක සභාව කැඳවන එක සම්මතයි කියලා සාරතී නැගිටලා ඇවිත්.නීති විරෝධී කැදවීමක් උනත් එතනදී විධායක සභාව කැදවන්න කියලා විදිමත් අනුමැතියක් හම්බවෙලා නෑ.

සාරතී එක පාරක්  හිටපු කතානායක කරූ ජයසුරිය පාර්තමේන්තුවේ පනතක් වැඩි හඩට සම්මත කලා වගේ මේකත් වැඩි හඩට අනුව සම්මත කරලා. පාර්ලිමේන්තුව නම් අර්බුදයක් හමුවේ වැඩි හඩට අනුව සම්මත කිරීමේ ප්‍රතිපාදනයක් තියනවා.ඒ වගේ ප්‍රතිපාදන දැන් ශ්‍රිලනිප ව්‍යවස්ථාවටත් ඇතුලත් කරලද දන්නේ නෑ.රටේ රාළ හිටපු පක්ෂ ප්‍රධාන ලේකම්වරයෙක් විදිහට පක්ෂයක විධායක සභාව කැඳවන විදිමත් ක්‍රම වේදයක් තියන බව දන්නවා.ඒක ශ්‍රිලනිප ව්‍යවස්ථාවෙත් ඇති.

ඒ සියලු ක්‍රමවේද උල්ලංඝනය කරමින් කරපු මේ විධායක සභා කැදවීම නීති විරෝධීයි.අද විධායක සභාව කැඳවන්න කියලා තීරණය කළාට මෛත්‍රී පාර්ශවයේ අයට ඒ බව දැනුම් දීලා තියෙන්නේ තීරණය ගන්න ඉස්සෙල්ලා.ඒක තහවුරු කරන්න දුන්න කෙටි පණිවිඩ රටේ රාළ ළඟත් තියනවා.ශ්‍රිලනිපයේ බලය සම්බන්ධ කාරණය දැන් තීරණය වෙන්නේ අධිකරණ දෙන තීරණ දෙකක් මත.මැතිවරණය කොමිෂමටත් පක්ෂයක අභයන්තර අර්බුදවලට මැදිහත් වෙන්න බෑ.

ඒක නිසා මේ දෙපාර්ශවයම අධිකරණ තීරණවලට ගරු කරමින් කටයුතු කරන්න ඕනි.අධිකරණ තීරණයෙන් පස්සේ තමයි විධායක සභාව කැඳවන්න නීත්‍යානුකූල අවසරය හම්බ වෙන්නේ. හැබැයි මේ විදිහට මේ ගන්න අනීතික ක්‍රියාමාර්ගවලටත් හේතුවක් තියෙන්න ඕනි.රටේ රාළට දැනෙන දේශපාලනයට අනුව නම් මේ දිගා වෙමින් තියෙන්නේ විජේදාස රාජපක්ෂ ශ්‍රිලනිප ජනාධිපති අපේක්ෂකයා කරන මෙහෙයුමේ කොටසක්.

සමහරවිට හෙට කැඳවන විධායක සභාවේ චිජේදාස සාමාජිකයෙක් විදිහට නම යෝජනා ස්ථිර කරන්නත පුළුවන්.මේ යන විදිහට එවෙලෙම විජේදාස වැඩබලන සභාපති වෙන්නත් බැරි නෑ. විජේදාස ජනාධිපති නීතිඥයෙක් වෙන්න ඇති.හැබැයි මේ සියල්ල අනීතිකයි.විජේදාස රාජපක්ෂට ඔය වගේ අසනීප ජන්ද කාලෙට හැදෙනවා.හරි ඔයාලා මෙහෙම හිතන්නකෝ ඔය මොන ක්‍රමයකින් හරි විජේදාස ශ්‍රිලනිප ජනාධිපති අපේක්ෂකයා වුනා කියලා. විජේදාසට කවදාවත් මේ ජනාධිපතිවරණ සටනේ ප්‍රධාන අපේක්ෂකයෙක් වෙන්න බෑ. රනිල්ට,සජිත්ට,අනුරට,දිලිත්ට වඩා විජේදාස ඉන්නේ ගව් ගානක් පිටි පස්සෙන්.

එහෙම මහජන විශ්වාසයක් විජේදාසට නෑ.ඒ වගේම එහෙම ජන පදනමක් හරි සංවිධාන බලයක් හරි විජේදාසට නෑ. විජේදාසගේ අධ්‍යාපන හැකියාව කවදාවත් රටේ රාළ අවතක්සේරු කරන්නේ නෑ.හැබැයි විජේදාස එන්න ඕනි හරි පාරේ.විජේදාසට දිනන්න බැරි නං එයාට වෙන්නේ තමන්ගේ අපේක්ෂකධූරය ප්‍රධාන අපේක්ෂකයෙක් ඉස්සරහා දේශපාලන වශයෙන් උකස් කරන්න.මොකද දිනන්න බැරි බව දන්න විජේදාස කරන්න හදන්නේ ශ්‍රිලනිපය අරගෙන ගිහින් අගමැතිකමකට හරි කැබිනට් ඇමතිකමකට හරි ඒ අපේක්ෂකත්වය දේශපාලන වශයෙන් උකස් කියන්න කියලයි රටේ රාළ කියන්නේ.

දැන් මෛත්‍රීලා දිගටම කියන්නේ දුම්න්දලා ශ්‍රිලනිපය ගෙනිහින් ආණ්ඩුවට හේත්තු කරන්න හදනවා කියලා.හැබැයි මෙතනදී වෙන්නේ ඊට වැඩිය භයානක දෙයක්. අනිවාර්යෙන් මෙතන වෙන්න වැඩි ඉඩක් තියෙන්නේ පෞද්ගලිකව සජිත් හරි රනිල් හර ඉදිරියේ විජේදාසගේ උවමනාවන්වලට පක්ෂය උකස් තියන එකයි.ඒක ශ්‍රිලනිපය විදිහට සන්ධානගත වෙලා වෙන අපේක්ෂකයෙකුට උදව් කරනවට වැඩිය භයානකයි.ශ්‍රිලනිප අනාගතය මෙහෙම උකස් තැබීම නං කරන්න දෙන්න බෑ.

මෛත්‍රීටත් නඩුවල තව ලොකු ගානක් ගෙවන්න ඇති.මෛත්‍රී වටකරගෙන ඉන්න දේශපාලන ළමා සොල්දාදුවන්ට දේශපාලනය තේරෙන්නේ නෑ.ඒක නිසා මෙහෙම හෝල් සේල් පක්ෂ විකුණලා දැමීම මහ අපරාධයක්.ඒක දේශපාලන හේතුන්ට වඩා ආර්ථික හේතුන් මත තමයි වෙන්නේ කියලයි රටේ රාළට දැනෙන්නේ.ශ්‍රිලනිපයේ හිටපු ජේෂ්ඨ නායකයෙක් විදිහට මෛත්‍රී කරන වැඩේ ශ්‍රිලනිපයට ආදරය කරන කිසි කෙනෙකුට අනුමත කරන්න බෑ.

මෛත්‍රීට සභාපතිධූරය අහිමි වෙයි කියලා තියන බයට ශ්‍රිලනිපය කෑලි ගානට වෙන්දේසියේ දානවා නං මෛත්‍රීටත් කුඩු වෙන්න ගහන්න රටේ රාළ පසුබට වෙන්නේ නෑ. මෛත්‍රී රටේ රාළගේ පෞද්ගලික යාලුවෙක්.ඒත් ඔය කා ඉස්සරහාවත් අපි අපේ දේශපාලනය සල්ලි කරලා නෑ.ඒක මෛත්‍රී දන්නවා.රටේ රාළට කියන්නේ මේ දක්වා මෛත්‍රී පාර්ශවයේ මැදිහත්වීම අනීතිකයි, ශ්‍රිලනිපයට අවාසිදායකයේ කියලයි.

හරි එහෙනම් ගිහින් එන්නම්.

ජයවේවා.

මීට 

රටේ රාළ.